ЖАСАНДЫ ИНТЕЛЛЕКТ ҚҰРАЛДАРЫН ҚОЛДАНУМЕН «СТАНДАРТТАЛҒАН ПАЦИЕНТ» ӘДІСІ БОЙЫНША АШЫҚ САБАҚ

2025 жылдың 1 сәуірінде «Шұғыл медицина және мейіргер ісі» кафедрасында «Жедел коронарлық синдром кезіндегі алғашқы дәрігерге дейінгі көмек» тақырыбында жасанды интеллект құралдарын қолдана отырып, «Стандартталған пациент» әдісімен ашық сабақ өткізілді. Ашық сабақты кафедра ассистенті Э.Ш. Юнусметов «Фармация» білім беру бағдарламасының В-ФҚК-01-24 тобының білім алушыларымен өткізді. Аталған іс-шара «Медицина» академиялық комитетінің төрайымы, бірлескен білім беру бағдарламаларын әзірлеу бөлімінің меңгерушісі Д. Әуезханқызының, «Мейіргер ісі» академиялық комитетінің төрайымы, докторантура және магистратура секторының меңгерушісі У.А. Ходжакулованың, әдістемелік бөлім меңгерушісі Б.М. Рашеваның, әдістемелік бөлімнің аға әдіскері Г.С.Алдабергенованың, тәжірибелік дағдылар орталығының дәрігер - нұсқаушы Г.С. Омарованың және «Шұғыл медицина және мейіргер ісі» кафедрасының ассистенті Э.А.Оразбаеваның қатысуымен өтті.

Сабақ барысында қатысушылар жедел коронарлық синдромға (ЖКС) күдікті науқастарға алғашқы дәрігерге дейінгі көмек көрсету дағдыларын пысықтады. Алдын ала дайындалған стандартталған пациент аурудың типтік белгілерін көрсетті, бұл қатысушыларға жағдайға барынша енуге және қажетті әрекеттерді орындауға мүмкіндік берді: бастапқы белгілерді анықтау; науқастың жағдайын бағалау және алғашқы диагностиканы жүргізу; дәрігерге дейінгі көмек көрсету, жедел жәрдем бригадасын шақыру және науқас туралы ақпаратты беру. Оқытудың бұл форматы қатысушыларға нақты клиникалық тәжірибеге барынша ұқсас жағдайларда дәрігерге дейінгі алғашқы көмек көрсету дағдыларын жетілдіруге мүмкіндік береді.

«Стандартталған пациент» әдісімен сабақтарда жасанды интеллект технологияларын қолдану медицина және фармация саласындағы мамандарды даярлау тиімділігін оңтайландыру және арттыру үшін жаңа мүмкіндіктер ашады. Симуляциялық технологияларды жасанды интеллекттің аналитикалық құралдарымен біріктіру кәсіби дайындықтың сапасын едәуір жақсартуға ғана емес, сонымен қатар қателерді дәл анықтау және уақытылы түзетуге мүмкіндік береді.