«Қамқорлық пен мейірімділік – әр адамның қоғамдық парызы», «Жүректен-жүрекке» тақырыбында қайырымдылық іс-шарасы.

2025 жылдың наурыз айының 5 - жұлдызында «Отбасылық медицина» кафедрасы ұжымы ІЖТДҚ-13-24; ІЖТДҚ-14-24; ІЖТДҚ-15-24; ІЖТДҚ-16-24; ІЖТДҚ-21-24; топтарының дәрігер интерндерімен бірге Шымкент қаласында орналасқан «Мамандандырылған балалар үйінде», «Жүректен жүрекке» атты қайырымдылық іс-шарасын ұйымдастырды.
Іс-шараның мақсаты: дәрігер –интерндерді қайырымдылық шараларына үйрету, интерндер арасында достық, ынтымақтастық, әлеуметтік жауапкершілікті насихаттау және рухани- адамгершілікті дамыту, әрбір азаматты қайырымдылық істерге тарту, баулу және балалар мен жасөспірімдердің арман-тілектеріне қол жеткізулеріне көмек беру, бүлдіршіндердің болашағы үшін ат салысу, балаларға сенім, қуаныш және қауіпсіздік сезімін сыйлау,
Кафедра қызметкерлері мен дәрігер интерндер балалардың көңіл-күйлерін көтеру, сергіту мақсатында концерттік бағдарлама мен ойындар ұйымдастырды. Іс-шара ата-ананың жылулығын көрмеген, туылғаннан балалар үйінде тәрбиеленіп жатқан балаларға бір сәт болсын жылулық сезімін беріп, көңіл күйлерін көтеру мақсатында жасалды.
Кафедра доценті Бектибаева Назипа Шахмановна сөз сөйледі: «Қайырымдылық–адамның ізгі қасиеттерінің бірі,жүректегі мейірімнің сәулесі. Яғни, балаларға көмек көрсету, қайырымдылық жасау – адам жанының ізгілігінен, рухани дүниесінің байлығынан, ішкі әлемінің жарықтығынан шығатын игі іс. Адам өміріндегі ең игі істерінің бірі- мұқтаж балаларға қамқорлық жасау. Қайырымдылық әрбір бала бойына сенім, жанына жігер ұялататыны сөзсіз.»
Интерн-дәрігерлер бүлдіршіндерге арнап ойындар ұйымдастырып, көңілді кеш сыйлады. Балалардың керемет дайындықпен ұйымдастырылған мерекелік ертеңгіліктерін тамашаладық. Балалар ән айтып, әдемі билерімен баршаны таң қалдырды. Кафедра ассистенттері жетекшілігімен дәрігер-интерндер дайындаған бүлдіршіндер үшін арнайы сыйлықтар балаларға табысталды.
Іс шара соңында мамандандырылған балалар үйінің меңгерушісі сөз сөйлеп, барлық қайырымды жандарға алғысын білдірді. Бұл қайырымдылық іс-шара балаларға қоғамның қолдауын, қамқорлығын түсінуге мүмкіндік беретінін атап өтті.
Атқарылған іс шара балалардың жан жақты дамуына, олардың эмоционалдық - психологиялық жағдайларының жақсаруына, оларға сенім мен қуаныш, қолдаужәне қауіпсіздік сезімін сыйлады деп сенеміз.