«17 наурыз – Шаңырақ күні»

Қазақ, орыс және латын тілдері кафедрасы 2025 жылғы 17 наурызда бірінші курс студенттерінің қатысуымен «17 наурыз – Шаңырақ күні» тақырыбында танымдық іс-шара өткізді. Қазақ мәдениетінде шаңырақтың қадір-қасиеті айрықша. Ол – әрі аспан күмбезі, әрі үй-жай, әрі тірек, әрі бақуаттылық пен қауіпсіздік және ұрпақтар сабақтастығы. «Шаңырақ» күні елдегі жас ұрпақты тәрбиелеу ісін дұрыс жолға қойып, олардың бойында патриотизм, адамгершілік, білімқұмарлық пен еңбекқорлыққа деген құштарлықты қалыптастыруға сеп болады. Бұл күні отбасылық құндылықтар насихатталады. Олар: сүйіспеншілік, құрмет, сенім, өзара көмек, мейірімділік, жанашырлық, анаға құрмет және ұрпақ сүю.
Іс-шара барысында студенттер бұл мерекенің қазақ халқының әлеуметтік, саяси, мәдени және тарихи өміріндегі маңызын түсіндірді. Студенттер ұлттық салт-дәстүрлерге арналған баяндамалар жасап, қызықты мәліметтермен бөлісті. Сонымен қатар, көркем шығармалардан өлеңдер оқылып, бейнефильмдер көрсетілді және тақырыптық суреттер көрмесі ұйымдастырылды. Іс-шараны қорытындылай келе, кафедра ұжымы белсенді қатысқан және өз өнерлерін көрсеткен студенттерге алғысын білдірді.