ЖҮРЕКТЕН ЖҮРЕККЕ

Фармацевтикалық және токсикологиялық химия кафедрасының ұжымы және «Фармация» БББ тәлімгерлік топтарының студенттері 14 наурыз – Көрісу күніне орай Түркістан облысының жұмыспен қамтуды үйлестіру және әлеуметтік бағдарламалар басқармасының «№2 Арнаулы әлеуметтік қызметтер көрсету орталығы» коммуналдық мемлекеттік мекемесіне мәдени-тәрбиелік іс-шарамен барып қайтты.

Көрісу күніне ешкім арнайы шақырылмайды, жайылған дастархан жиылмайды. Адамдар бір-біріне түске дейін көрісіп шығуға тырысады. Түске дейін нағыз мейрам сезіледі. Көрісе келген адамдар (көбіне жастар) көрісіп шыққан үйінің дастарқанынан дәм алып кетеді. Адамдар жаңа не таза киім киеді. Өкпе-ренішті ұмытып, көрісу күнінде адамдар бір-бірімен табысады. Көрісе шыққан адамды қабақ шытпай көтеріңкі көңіл күймен қарсы алып, дастарқанға шақырады.

Орталықта 160 қа жуық қарттар мен мүмкіндігі шектеулі науқастарға қызмет көрсетіледі. Білім алушылар ол кісілерге концерттік бағдарламамен барып, ерекше қуаныш сыйлады. Әуезді ән, мың бұралған бишілер, күмбірлеген домбыра, гитара және саксофонда өнер көрсетті.

Осы орайда қарттарымызға арнап сыйлық ретіне киімдер, дәрі-дәрмек, мерекелік дастархан жайылды. Қарттар көздеріне жас алып, ақ баталарын беріп, жүрекжарды тілектерін арнады.

Бұл кездесу студенттер үшін де, кафедра ұжымы үшін де ұмытылмас әсер қалдырды. Олар үлкендердің мейірімін сезініп, Амал мерекесінің шынайы мәнін түсінді.