Халықаралық ынтымақтастықтың тағы бір қыры

Фармацевтикалық және токсикологиялық химия кафедрасында Жоғары білім және ғылым Академиясы жанындағы фармацевтикалық колледжі (JSS College of Pharmacy, Майсуру, Үндістан) фармацевтикалық химия кафедрасының оқытушысы, философия докторы (PhD) Прабита Прабакаран визитингі өтті.

Визитинг бағдарламасы “Фармация” және “Фармацевттік өндіріс технологиясы” БББ 3-5 курс білім алушыларына арналған дәріс және тәжірибелік сабақтар тақырыптары негізінде құрастырылып, сонымен қатар магистранттар, докторанттар, оқытушылар мен Фармация ғылыми-зерттеу орталығының ғылыми қызметкерлеріне арналған мастер-кластар өткізілуімен қамтылды.

Доктор П. Прабита өзінің күнтізбелік-тақырыптық жоспарына сай 3 курс студенттерімен Д.И.Менделеев периодтық жүйесінің III-VIII топ элементтерінің дәрілік заттарын талдау сияқты тақырыптарда сабақ жүргізді. Лектор табиғаты бейорганикалық дәрілік заттарды алу көздері мен сапасын бақылау әдістері, олардың фармацевтикалық талдаудағы ерекшеліктеріне тоқталып өтті.

4 курс студенттерімен пиридинметанол, пиридин-3-карбон қышқылы, пиридин-4-карбон қышқылы, тропан және т.б. гетероциклді қосылыстар туындыларының дәрілік заттарын талдау бойынша сұрақтарды талқылады. Дәріс беруші дәрілік заттардың химиялық құрылысы мен фармакологиялық әсері арасындағы байланысын, негізгі субстраттардың молекуласына белгілі бір белсенді фармакофорлы топтарды енгізу әдістерін жан-жақты талқылады. Дәрілік заттарды ілеспе, жүре пайда болған қоспалардан тазарту, оларды анықтауда және бақылауда сезімтал әдістерді таңдау жайлы сұрақтар да назардан тыс қалған жоқ.

Мастер-класта ерекше қызығушылық тудырған фармацевтикалық ғылымның өзекті бағыттарының бірі - фармакофорлы моделдеу (Pharmacophore modeling), молекулярлы докинг (Molecular docking), молекулярлы моделдеу (Molecular modeling), дәрілерді компьютерлік жобалау (Computer-aided drug design, CADD), шекті тестілеу (Limit test) болып табылды. Қарастырылып отырған инновациялық зерттеу әдістері берілген, жақсартылған биологиялық белсенділігі мен селективтілігі, оңтайлы фармакокинетикалық параметрлері, физика-химиялық қасиеттері бар дәрілік препараттарды жасауға, жанама әсерлерді азайтуға, экономикалық қолжетімділікті және ғылыми әзірлемелердің басқа да артықшылықтарын қамтамасыз етуге мүмкіндік береді.

Жоғары білім және ғылым Академиясы жанындағы фармацевтикалық колледж және оның білім мен ғылыми-зерттеу жұмыстары бойынша жетістіктері жайлы толық мәлімет берілді. Доктор Прабита П. биомедициналық және геномдық ақпаратқа қолжетімділікті қамтамасыз ету арқылы ғылым мен денсаулық сақтауды дамыту басты мақсаты болып табылатын Ұлттық биотехнологиялық ақпарат орталығы (National Centre for Biotechnology Information) туралы толық ақпарат берді.

Біз JSS College of Pharmacy мен ОҚМА басшылығына қарым-қатынас жасауға қолдап, мүмкіндік бергені үшін, сондай-ақ доктор П.Прабитаға тәжірибе алмасқаны үшін, осындай қызықты іс-сапар бағдарламасы және білім беру мен ғылыми бағыттарда ынтымақтастық орнатуға дайын екендігі үшін алғысымызды білдіреміз.