ҰЛТТЫҚ КИІМ – ҰЛТ МҰРАСЫ

18 наурыз – Ұлттық киім күніне орай Фармацевтикалық және токсикологиялық химия кафедрасының оқытушылары «Фармация» БББ тәлімгерлік топ студенттерімен бірге тәлімгерлік сағат өткізілді. Сабақ барысында ұлттық мұраны ұлықтап, дәстүрді жаңғыртуға шақырды. Қазақтың ұлттық киімі – ұлтымыздың рухани айнасы, тарихымыздың тілсіз шежіресі. Ол ғасырлар бойы көшпелі өмір салтына бейімделіп, табиғатпен үндесе дамыды. Киімдегі әрбір элемент – жай ғана сән емес, халықтың дүниетанымы мен құндылықтарының көрінісі.

Шапан – құрметтің, сәукеле – сұлулықтың, тымақ – ерліктің белгісі болса, ою-өрнектер терең мағынаға ие. Бүгінде ұлттық киім жаңа заманға сай бейімделіп, сән әлемінде қайта жаңғыруда. Бұл – халқымыздың өз тамырына деген құрметі, ұлт болмысының сақталуының белгісі. Ұлттық киімді дәріптеу – өткенді құрметтеу ғана емес, оны болашақ ұрпаққа жеткізудің аманаты.