ҚР Парламентінің Сенаторы «ашық дәріс» өткізді

Жоғары және жоғары оқу орнынан кейінгі білім комитеті ҚР Парламентінің 30 жылдығын ұйымдастыру және өткізу жөніндегі іс-шаралар жоспарына сәйкес, 18.03.25ж. күні «Қазақстан тарихы және әлеуметтік-қоғамдық пәндер» кафедрасында ҚР Парламент сенатының депутаты Бекназаров Нұрлан Құдиярұлы ОҚМА-ң «Медицина» факультетінің 2 курс студенттерімен ZOOM платформасында «ашық дәріс» өткізді.
«Ашық дәрістің» негізгі мақсаты — студенттерге ҚР Парламентінің жұмысы мен заң шығарушы органның рөлі туралы түсіндіру, сондай-ақ Қазақстандағы денсаулық сақтау саласының дамуындағы заңнамалық реформалар мен өзгерістер туралы ақпараттандыру болып табылады.
ҚР Парламентінің 30 жылдығы — бұл маңызды мерейтой, өйткені ол Қазақстанның тәуелсіздігін жариялағаннан кейінгі еліміздің заң шығарушы органының қалыптасуы мен дамуының үлкен кезеңін білдіреді. 1995 жылы 30 тамызда Қазақстан Республикасының Конституциясы қабылданғаннан кейін, Парламент елдің саяси және құқықтық жүйесінің маңызды институтына айналды.
Сенатор Н.Қ.Бекназаров студенттерге Парламент, Сенат жұмысының ерекшеліктері, заң қабылдау процесі, қоғамда болып жатқан маңызды саяси және әлеуметтік мәселелер туралы ақпарат берді. Сонымен қатар, студенттерге қазіргі заңнамалар мен елдің саяси жүйесін түсінуге мүмкіндік беріп, оларды болашақта саяси және қоғамдық өмірге белсене қатысуға ынталандырды. Сондай-ақ, жастардың арасындағы діни, этика мәселесі, денсаулық сақтау саласындағы заңнамалар мен реформалар, фармацевтикалық өнімдерді өндіру, сапасын бақылау және тарату бойынша қабылданған заңдармен таныстырып өтті.
Сенатормен өткен ашық дәріс еліміздің заң шығарушы билігінің даму жолын саралап, оның Қазақстанның тәуелсіздігі мен демократиялық принциптеріне қосқан үлестерін айқындайды. Мұндай ашық дәрістер студенттерді қоғамдық өмірге белсене араласуға, еліміздің саяси жүйесіне жауапкершілікпен қарауға тәрбиелейді.