Жұқпалы Аурулар Және Олардың Алдын Алу: Мектептегі Ашық Сабақ

«Оңтүстік Қазақстан медицина академиясы» АҚ ВМ-МОқ-05-25 тобының студенттері «Гигиена және эпидемиология» кафедрасының профессор міндетін атқарушы Д. М. Кульмирзаевамен бірлесіп, Smart Students мектебінің 7–8-сынып оқушыларына «Жұқпалы аурулар және олардың алдын алу» тақырыбында ашық сабақ өткізді.
Іс-шараның мақсаты оқушылардың жұқпалы аурулар, олардың жұғу жолдары, қауіп факторлары және негізгі алдын алу шаралары туралы хабардарлығын арттыру болды.
Кездесу барысында студенттер тұмау және басқа да жіті респираторлық инфекциялар, вирустық гепатиттер, ішек инфекциялары, жануарлардан адамға жұғатын зооноздық инфекциялар және басқа да кең таралған жұқпалы аурулар туралы ақпарат ұсынды.
Өткізілген іс-шара оқушылардың жұқпалы аурулар туралы білімдерін кеңейтуге ықпал етті. Қоздырғыштардың таралу жолдарына, аурулардың алғашқы белгілеріне, жеке гигиена қағидаларына, тағам өнімдері мен суды қауіпсіз тұтынуға, сондай-ақ вакцинацияның және медициналық көмекке уақтылы жүгінудің маңыздылығына ерекше назар аударылды.
Іс-шара оқушыларға түсінікті әрі интерактивті түрде өтті. Оқушылар талқылауға белсенді қатысып, өздерін қызықтырған сұрақтарын қойды, ұсынылған тапсырмаларды орындады және баяндамашылардың сұрақтарына жауап берді. Кездесу соңында оқушыларға медициналық маскалар мен қолғаптар, С дәрумені және пайдалы фитнес-батончиктер таратылды.
Осындай ағартушылық кездесулер медицина студенттеріне алған білімдерін тәжірибеде қолдануға, әртүрлі жас топтарымен қарым-қатынас жасау дағдыларын дамытуға және санитариялық-ағарту жұмысына қатысуға мүмкіндік береді.