Академиялық ұтқырлық – халықаралық ынтымақтастықты нығайтудың маңызды тетігі
Оңтүстік Қазақстан медицина академиясы мен Әбуали ибни Сино атындағы Тәжік мемлекеттік медицина университеті арасындағы ынтымақтастық туралы меморандум аясында ОҚМА-ның Дәрілер технологиясы және фармация ісін ұйымдастыру кафедрасына «Фармация» оқу-ғылыми-өндірістік орталығының директоры, биология ғылымдарының кандидаты, доцент Г. О. Раджабов іссапармен келді. Сапар академиялық ұтқырлық бағдарламасы шеңберінде ұйымдастырылып, білім беру, ғылыми-зерттеу және оқу-әдістемелік бағыттардағы халықаралық өзара іс-қимылды дамытуға арналды.
2026 жылғы 9–13 қараша аралығында доцент Г. О. Раджабов заманауи фармацияның өзекті бағыттары бойынша дәрістер, практикалық сабақтар, семинарлар мен шеберлік сабақтарын өткізді. Бағдарлама барысында фармацевтикалық қызметті ұйымдастыруда цифрлық технологиялар мен жасанды интеллектіні қолдануға, дәрілік заттарды өндіру технологиясы мен олардың сапасын бақылауға, төтенше жағдайлар кезінде фармацевтикалық көмекті ұйымдастыруға, медициналық және фармацевтикалық тауарлардың сапасы мен қауіпсіздігін бағалауға ерекше назар аударылды. Сонымен қатар фармакоэкономика, фармацевтикалық логистика және дәрілік заттар қорын басқару мәселелері қарастырылды.
Сапардың маңызды нәтижелерінің бірі екі университеттің бейінді құрылымдық бөлімшелері арасындағы ынтымақтастықты одан әрі дамытудың перспективаларын талқылау болды. Қатысушылар бірлескен ғылыми және білім беру жобаларын іске асыру, кәсіби тәжірибе алмасу, оқу-әдістемелік қызметті жетілдіру, сондай-ақ шетелдік білім алушыларға арналған фармацияны басқару және экономикасы бойынша бірлескен өндірістік практика бағдарламасын әзірлеу мүмкіндіктерін қарастырды. Мұндай бастамалар академиялық байланыстарды нығайтуға, халықаралық әріптестікті кеңейтуге және фармацевтика саласы мамандарын даярлау сапасын арттыруға ықпал етеді.